अंधेरीच्या सी. डी. बर्फीवाला हायस्कूलचे उपमुख्याध्यापक राम कांबळे यांनी शुक्रवारी शाळेच्या इमारतीवरून उडी मारून आत्महत्या केली. आपण तणावाखाली हे पाऊल उचलत असल्याचे कांबळे यांनी आत्महत्येपूर्वी लिहिलेल्या चिठ्ठीत म्हटले आहे.
अंधेरी पश्चिमेकडील वर्सोवा येथे सी. डी. बर्फीवाला हायस्कूल असून राम कांबळे अनेक वर्षांपासून या शाळेत अध्यापन करीत होते. शुक्रवारी सकाळी ते नेहमीप्रमाणे हायस्कूलमध्ये आले. सकाळी नऊच्या सुमारास हायस्कूलच्या चार मजली इमारतीच्या गच्चीवर जाऊन त्यांनी खाली उडी मारली. याबाबत माहिती मिळताच डी. एन. नगर पोलिस घटनास्थळी पोहोचले आणि जखमी अवस्थेतील कांबळे यांना उपचारासाठी जवळच्या रुग्णालयात नेले, पण दाखल करण्यापूर्वीच डॉक्टरांनी त्यांना मृत घोषित केले. घटनास्थळी एक चिठ्ठी सापडली असून, ‘मी प्रचंड तणावाखाली आहे. त्यामुळे मी माझे जीवन संपवित आहे’, असे कांबळे यांनी चिठ्ठीत म्हटल्याचे डी. एन. नगर पोलिस ठाण्याचे वरिष्ठ पोलिस निरीक्षक परमेश्वर गणमे यांनी सांगितले.